Аймақта эпидемиологиялық маусым басталғалы бері 72 мыңнан астам адам жедел респираторлық вирустық инфекция жұқтырған. Былтырғы маусыммен салыстырғанда тұмау мен инфекция өршіп тұр. Бұл туралы мамандар не дейді? Толығырақ келесі бейнематериалда.
Бүгінде Павлодар облысындағы респираторлық инфекциялар мен тұмау бойынша эпидемиологиялық жағдай тіркелген сырқаттанушылық деңгейімен сипатталады. Өткен эпидемиологиялық маусыммен салыстырғанда сырқаттанушылықтың шамалы өсуі байқалып отыр. Мамандар мұны маусымдық аурушаңдықтың табиғи динамикасымен байланыстырады.
Замзагүл Дощанова, Павлодар облысы санитариялық-эпидемиологиялық бақылау департаменті басшысының орынбасары
46-аптамен салыстырғанда 47-аптада, яғни 20–26 қараша аралығында, облыстың кейбір аудандарында сырқаттанушылықтың аздаған өсуі байқалды. Мәселен, Екібастұз қаласында – 3 пайызға. Ал Тереңкөл, Май, Успен, Аққулы, Ақтоғай және Баянауыл аудандарында 5 пайыздан бастап 1,1–1,4 есеге дейін өсім тіркелген. Сонымен қатар, екі қала мен төрт ауданда көрсеткіштің төмендеуі байқалып отыр.
Ертіс, Железин, Шарбақты және Павлодар аудандарында 5 пайыздан 29 пайызға дейін жеткен. Павлодар қаласында көрсеткіш бір аптада 29 пайызға азайса, Ақсуда ауырғандар саны 19 пайызға төмендеген.
Замзагүл Дощанова, Павлодар облысы санитариялық-эпидемиологиялық бақылау департаменті басшысының орынбасары
Эпидемиологиялық маусым басталғалы бері облыс аумағында А типті және H3N2 типті тұмаудың 42 жағдайы тіркелді. Оның ішінде: 21-і – балалар арасында, 1 жағдай – жасөспірімдер, 20 жағдай – ересектер арасында тіркелді. Ұлттық сараптама орталығының вирусологиялық зертханаларында 510 үлгі зерттеліп, оның 7-інен риновирус, бокавирус және коронавирус анықталды.
Жалпы, мамандар облыстағы эпидемиологиялық ахуалды тұрақты деп бағалайды. ЖРВИ бойынша табиғи маусымдық өсім ғана тіркелген.
Замзагүл Дощанова, Павлодар облысы санитариялық-эпидемиологиялық бақылау департаменті басшысының орынбасары
Облыс тұрғындарына қарапайым профилактикалық шараларды сақтауды ұсынамыз. Бөлмелер мен жұмыс орындарын жиі желдету, ауаны ылғалдандыру, ылғалды тазалық жасау, жеке гигиенаны сақтау, қолды сабынмен жуу, дәруменге бай тағамдармен дұрыс тамақтану – маусымдық вирустардан қорғанудың негізгі жолдары. Ауру белгілері байқалған жағдайда уақыт оздырмай дәрігерге қаралу қажет.
Сондай-ақ, соңғы уақытта халық арасында сөз болып жүрген Гонконг тұмауына қатысты мамандар алаңдауға негіз жоқ дейді. Бұл — жедел респираторлық вирустық инфекцияның кең таралған түрі. H3N2 немесе Гонконг тұмауы А типіне жатады. Павлодар облысында ол алғаш рет 2023–2024 жылғы эпидемиологиялық маусымда тіркеліп, 63 жағдай анықталған. Дүниежүзінде бұл вирус алғаш рет 1968 жылы Гонконг қаласында белгілі болған. Аурудың белгілері маусымдық тұмауға тән, сондықтан дәрігерлер тұрғындарды жеңіл-желпі қарамай, сақтық шараларын сақтауға шақырады.
Дильназ Қуанышбекқызы