Павлодар облысында эпидемиологиялық жағдай тұрақты дегенімен, сырқаттанып, дәрігердің көмегіне жүгінгендер саны артқан. Әсіресе балалар арасында жіті респираторлық вирустық инфекция өршіп тұр. Ал тұмауға қарсы дәрі-дәрмек қоры жеткілікті ме ? Толығырақ сюжетте.
Қазір ересектермен қатар, балалар да ауырып жатыр. Негізгі белгілер дене қызуының көтерілуі мен жөтел. Осыған байланысты мамандар халықты антибиотиктерді орынсыз қабылдауды тоқтатуға шақырады.
Дария Ахметова, №5 емхананың жалпы тәжірибелік дәрігері
Жылда осы уақытта, қыркүйек-қараша айлары аралығында эпидемиологиялық маусым болып, ауырғандар қатары артады. Вирустық инфекцияларға вирусқа қарсы препараттар қолданылады. Клиникалық хаттамаға сәйкес осильтамивир тағайындалады. Бұл вирус жаңа басталған кезде алғашқы 2-3 күнде қажет.
Егер науқастың жағдайы алғашқы 2–3 күн ішінде жақсару орнына күрт нашарлап, жөтел үдеп, асқыну белгілері байқалса, дереу дәрігерге қаралу керек. Тек сол кезде ғана маманның нұсқауымен антибиотиктер тағайындалады.
Дария Ахметова, №5 емхананың жалпы тәжірибелік дәрігері
Бақылаусыз антибиотиктерді іше беру сырқаттанған адамның денсаулығына кері әсерін тигізуі мүмкін. Резистенттілікке әкеледі. Вирустар мен бактериялар бақылаусыз емделсе, аталмыш препаратқа бағынбай кетеді. Мысалы азитромицинді жаппай бәрі қолдана берсе, келесі жолы бұл препарат көмектеспей қояды. Одан ауыр дәрі-дәрмекке көшуге тура келеді.
Қазіргі таңда дәрі-дәрмек мәселесі бойынша еш алаңдаудың қажеті жоқ.Себебі фармацевт мамандардың айтуынша, бүгінде өңірдегі дәріханаларда тұмауға қарсы қажетті барлық дәрілер жеткілікті көлемде бар.
Сәния Дыбыкен, «Фармаком» ЖШС-нің дәріхана меңгерушісі
Бүгінде біздің дәріханаларда маусымдық ауруларды емдеуге арналған препараттардың жеткілікті болуы тұрақты және толық бақылауда. Біз қажетті дәрі-дәрмек қорын қалыптастыру мақсатында жаз айларынан бастап алдын ала жоспарлы жұмыстар жүргіздік. Бүгінде дәріханаларда температураны төмендететін және ауырсынуды басатын парацетамол мен ибупрофен негізіндегі дәрілер толық көлемде бар. Сондай-ақ тамақ ауруына қарсы түрлі спрейлер, пастилкалар, шаюға арналған ерітінділер, мұрын бітелуіне арналған тамшылар мен спрейлер, жөтелге қарсы муколитиктер және қақырық түсіретін сироптар бар. Дәріханаларда тұмауды емдеуге қолданылатын вирусқа қарсы дәрілердің жеткілікті қоры толықтай қамтамасыз етілген.
Бұл препараттар тек дәрігердің кеңесі мен рецепті бойынша беріледі. Дәріхана қызметкерлері қажет болса, баламалы нұсқаларды немесе бағасы қолжетімді ұқсас препараттарды ұсынуға дайын.
Дильназ Қуанышбекқызы