Елімізде жыл сайын өтетін «Зорлық-зомбылықсыз 16 күн» республикалық акциясы Екібастұз қаласында да жалғасты. Шараның мақсаты қоғамдағы тұрмыстық зорлық-зомбылықтың алдын алу және тұрғындарға құқықтық көмек көрсету. Акция аясында мамандар халықпен жүздесіп, құқықтық кеңес берді. Ақпараттық жадынамалар таратты.
Биыл Екібастұз қаласында тұрмыстық зорлық-зомбылық бойынша 500-ден астам азаматтың өтініші тіркелді. Әрбір жәбірленушіге дер кезінде көмек көрсетілді. Учаскелік инспекторлар қорғау нұсқамасын шығарып, қажет жағдайда азаматтарды дағдарыс орталықтарына орналастырады. Оларға медициналық, психологиялық және құқықтық қолдау көрсетіледі.
Бақытгүл Сейітқалиева, Екібастұз қаласы ПБ отбасылық-тұрмыстық зорлық-зомбылықпен күрес жөніндегі бөлімінің басшысы
Қазіргі уақытта барлық Екібастұз қаласының тұрғындарына, қонақтарына қандай әрекет жасау керек, қандай жұмыс атқару керектігін айтып, көрсетіп, жеткізіп, БАҚ қызметкерлеріне көрсетуіміз керек. Әр адам өз құқығын білу керек. Әсіресе әйел адамға байланысты осындай акция өткізген кезде жыл сайын осындай жұмыстар атқарылады. Ең бастысы ауылдық жерлерге жұмыс бағытталған. Ертеңнен бастап ауылдарға шығуға бастаймыз. Осы акцияның мақсаты халыққа жеткізу зорлық-зомбылыққа ұшыраған кезде, қайда хабарлау керектігін. Сонымен қатар куә болған кезде қайда хабарласу керектігін және сенім телефондарының жұмыс істейтінін көрсету.
Отбасылық жанжалды сотқа жеткізбей шешу үшін Екібастұзда билер алқасы жұмыс істейді. Бір жылдан астам уақыт ішінде олар бірнеше даудың басын шешіп, көптеген отбасыларды татуларстырған. Акция аясында олар тұрғындарға медиация қызметінің маңызы туралы кеңес берді.
Жұмажан Паруов, «Екібастұз билер алқасы» ҚБ төрағасы
Бақытты өмір сүру үшін, шаңырақ шайқалмау керек. Сондықтан кешірімді болу керек негізі. Бұл жалғыз жастардың ортасында емес, үлкен кісілердің ортасында кездесіп жатады. Енді бір-бірімен келісе алмай, аяғы ұрыс-керіске айналып, сонымен сотқа жүгініп жататын жағдайлар болады. Осы біз қоғамдық жұмыста көп жүреміз. Үлкен ақсақалдардың, жастардың арасында. Мектептің табалдырықтарынан аттап, сол жастармен көбінесе шаралар өткіземіз. Айтарым, шама келгенше осы зорлық-зомбылыққа бәріміз ат салысуымыз керек. Енді, ашу деген дұшпан, ақыл деген адамның ойынан кетпейтін нәрсе, сол ақылға жеңдіру керек. Сондықтан ашуға орын бергеннен гөрі, ақылмен іс істеген дұрыс деп ойламйын.
Акция барысында шаһар тұрғындары мен қонақтарға зорлық-зомбылықтың алдын алу бойынша кеңестер беріліп, ақпараттық парақшалар таратылды.
Мамандар мұндай жағдайға тап болсаңыз немесе куә болсаңыз, бірден 102 нөміріне немесе 111 – Отбасы, әйелдер мен балалардың құқықтарын қорғау жөніндегі байланыс орталығына хабарласу керек екенін айтады.
Сабина Жолдаспаева