Железин, Павлодар, Шарбақты және Тереңкөл аудандарының фермерлері «Таза Қазақстан» акциясына ат салысты. «Jailau» базарындағы дәстүрлі сенбілік жәрмеңкеден кейін олар тазалық пен көркейту жұмыстарына белсене қатысты.
Түске қарай фермерлердің басым бөлігі өз өнімдерін сатып үлгеріп, сауда орындарын тазалауға кірісті. Ұйымдастырушылардың айтуынша, ауыл шаруашылығы тауар өндірушілері әдетте де саудадан кейін тазалық жұмыстарын жүргізеді. Алайда бұл жолы экологиялық акция аясында жұмыс ерекше қарқын алған.
Ауыл шаруашылығы басқармасының бас маманы Татьяна Нагуланың сөзінше, мұндай шаралар тек сауда емес, тазалық мәдениетін қалыптастыруға бағытталған. Ол жәрмеңкеге келген тұрғындарды қоршаған ортаға ұқыпты қарап, қоқысты жинауға және тәртіп сақтауға шақырды.
Фермерлер де экологиялық бастамаға жауапкершілікпен қарап, сауда аяқталған соң жұмыс орындарын ретке келтіріп, қоқыстарды жинады. Олардың айтуынша, тазалық — сатып алушыларға, әріптестерге және туған жерге деген құрметтің белгісі.
Осындай экологиялық жәрмеңкелер Екібастұз бен Ақсу қалаларында, сондай-ақ облыстың барлық аудандарында өтті.