Қастерлі құндылықтар – бала кезден қалыптасады

Өскелең ұрпақты тәрбиелеу және азаматтық жауапкершілікті қалыптастыру отбасынан, сонымен қатар, мектептен басталады. Адамдарды құрметту, еңбекқорлық, адалдық пен Отанға деген сүйіспеншілік сияқты қасиеттердің негізі дәл осы ортада қаланады. Бұл құндылықтар Мемлекет басшысының Жолдауында айқындалған «Адал азамат» тұжырымдамасында да көрініс тапқан.

Ұстаздардың пікірінше, мектеп тек білім берумен ғана шектелмеуі керек. Ең маңыздысы– балалардың бойында Отан алдындағы борыш сезімін қалыптастыру. Ол үшін оқушыларға өз таланттарын танытуға, шығармашылық идеяларын жүзеге асыруға мүмкіндік жасалуы тиіс.

Әсел Билялова, №18 жалпы орта білім беретін мектебі басшысының тәрбие жұмысы жөніндегі орынбасары

«Мемлекет басшысы өз Жолдауында жаңа қоғамдық этиканы қалыптастырудың, “Адал азамат” құндылықтарын нығайтудың маңыздылығын атап өтті. Бұл – жауапкершілік, жасампаздық және ұлттық бірлік құндылықтары. Аталған міндеттер ең алдымен балалық шақтан, отбасынан және мектептен басталады. Біз әр бала бастамашыл бола алатын және өз күшіне сенетін білім беру жүйесін қалыптастыруымыз керек. Біздің басты міндетіміз – жай ғана танымал балаларды тәрбиелеу емес, өз елінің лайықты азаматы, нағыз “Адал азамат” тұлғасын қалыптастыру. Олар өз білімдерімен, істерімен және бастамаларымен Қазақстанның болашағына үлес қосуы тиіс».

Тұлға тәрбиелеу – ұстаздар мен ата-аналардың бірлескен жауапкершілігін талап ететін ортақ міндет. Тек осындай бірліктің арқасында болашақта қоғам алдындағы іс-әрекеттеріне бағыт-бағдар болатын дұрыс құндылықтарды бойына сіңірген ұрпақ тәрбиелей аламыз.