Академик Қаныш Сәтбаевтің мерейтойы аясында Баянауылда республикалық ақындар айтысы өтті. Арқалы ақындар айтысына ҚР Еңбек сіңірген қайраткері Жүрсін Ерман қазылық етті. Барлығы 12 айтыскер қатысқан айтыстың бас жүлдесін жерлесіміз жеңіп алды. Толығырақ алдағы сюжетте.
Бақ мекен Баянауылда өткен айтыс жоғары деңгейде ұйымдастырылды. Мәдениет үйінде ине шаншар орын болмады. Яғни, қазақтың өнерін көруге келген көрермендер де көп болды. Алдымен аудан әкімі сөз алып, ақындардың қадамдарына сәттілік тіледі.
АРДАҚ КІСЕНТАЕВ, БАЯНАУЫЛ АУДАНЫНЫҢ ӘКІМІ
Айтыс халықтың төл өнері. Осы өнерде ұрпаққа берілген сарқылмас тәрбие мен тәлім жатыр. Оның үстіне сөз қозғайтын ақынның жері Баянауыл төрінде осындай өнерді дәріптемесек бізге сын. Бүгінгі ақындар айтысының тақырыбы да ауқымды. Ол Қаныш Имантайұлының 125 жылдық мерейтойына арналып отыр. Сұлу сөзді жыр маржанымен құраған өр рухты ақындар қазақтың біртуар перзентін жырға қоспақ. Халық даналарының көрінісін қызыл тілмен жетелеген айтыс өнері халық мақтанышы. Бұл іс-шара киелі өнерімізді дамытып, жас ұрпақтың бойына бабалардың дәстүрін дамытуға септігін тигізеді
Республикалық ақындар айтысының бірінші кезеңіне 12 ақын,барлығы 6 жұп қатысты. Өңіріміздің намысын Аспанбек Шұғатаев, Рауан Қайдар, Нұрқанат Қайрат қорғады. Бұдан бөлек қарағандылық Айтбай Жұмағұлов, Тілеген Әділов, елордалық Еркенбұлан Қайназаров, тараздық Айтбек Тұрсынбай, шфмкенттік Нұрлан Есенқұлов, атыраулық Батыржан Қадірбай, маңғыстаулық Абай Жолмағанбет пен шығыс қазақстандық Нәрия Ақбабақызы өнер көрсетті. Айтысты талай аламанның бас бәйгесін алған ақын Аманжол Әлтаев жүргізді.
АМАНЖОЛ ӘЛТАЕВ, ҚР ЕҢБЕК СІҢІРГЕН ҚАЙРАТКЕРІ
Хәкім Абай ұлттың алтын қазағы, Ахмет Байтұрсынұлы ұлт ұстазы, ал Қаныш Сәтбаев қазақ ғылымының атасы. Мемлекет басшысы Қасым-Жомарт Кемелұлы Тоқаев ұлы ғұламаның мерейтойын жоғары деңгейде атап өтуді тапсырды. Осы мақсатта өкіметтің арнайы қаулысы шығып, жыл басынан бері Тәуелсіз мемлекетіміздің түкпір-түкпірінде Қаныш Имантайұлын ұлықтауға арналған қаншама игі шаралар өтіп жатыр. Елордамыз Астанадан бастап, әрбір қазақ даласының түкпір-түкпірінде ұлы перзентіне деген халқының сағынышы, махаббаты көрініс тауып келеді
От ауызды, орақ тілді ақындар сынға түскен айтыста ҚР Еңбек сіңірген қайраткері Жүрсін Ерман бас қазысы болды. 12 ақын жыр жалауын желбіреткен жыр додасын алғашқы болып Астананың төрінен келген Еркебұлан Қайназаров пен қарағандылық Айтбай Жұмағұлов бастады. Айта кетейік, әр жұпқа әртүрлі тақырып берілді. Алғашқы жұп көпті күлдіріп, айтыстың жарасымды үлгісін көрсетті. Бірін-бірі әзіл қалжыңмен қағытып отырды.
Сахнаға шыққан 6 жұпта суырыпсалмалығымен дес бермеді. Сөзден сүрінбеді. Ал, айтыстың финалына 6 ақын жолдама алды. Екінші кезең Мойылды шатқалында жалғасты. Солардың бірі, облыстың үкілеген үміті Рауан Қайдар болды.
Жыр додасында бақ сынаған ақындар сөзге шешендігі мен ой ұшқырлығын көрсетті. Жерлесіміз Аспанбек Шұғатайдың айтысына көпшілік құлақ құрышын қандырды. Айтысқа ақын Қаныш атамыз ұстаған қасиетті домбыраны алып шықты.
АСПАНБЕК ШҰҒАТАЙ, АЙТЫСКЕР АҚЫН
Бұл домбыра Қаныш атамыз өзі ұстап,талай ән шырқаған қасиетті домбыра. Бұл домбыра Баянауылдағы мұражайда тұр. Сол домбыраны атамның тойына ырым қылып, ұстап шыққан ниетім бар. ІӘр қазаққа Сәтбаевтай ұл бұйырсын
Республикалық ақындар айтысының қорытындысы бойынша, жүлделі 3 орынды Нұрлан Есенқұлов пен Рауан Қайдар иеленді. Ал екінші орынды арқа төрінен келген Тілеген Әділов қанжығалады. Бірінші орын сонау маңғаз Мағыстаудан жеткен Абай Жолмағанбетке бұйырды. 700 мың теңге арнайы жүлдеге елордалық Еркебұлан Қайназаров ие болды. Ал айтыстың бас жүлдені бағы мен бабы келіскен Аспанбек Шұғатаев жеңіп алды.
Айта кетейік, бас жүлдеге автокөлік, ал бірінші орынға үш миллион, екінші орынға екі миллион, үшінші орынға бір миллион теңге табысталды.
Шындықты домбыраның шынағына сыйдырған ақындардың өнеріне барша көрермен риза болды.
Қымбат Садық