Конституция күні қарсаңында Успен ауданында жиын өтті. Онда еліміздің басты заңының рөлі мен маңызы сөз болды. Дөңгелек үстелде қатысушылар – мемлекетіміздің берік іргетасы, азаматтардың құқықтары мен бостандықтарының кепілі екенін атап өтті.
Қазақстан Конституциясы 1995 жылы 30 тамызда бүкілхалықтық референдумда қабылданды. Содан бері бұл күн мемлекеттік мереке ретінде аталып өтеді. Негізгі заң ел тәуелсіздігінің құқықтық негізін бекітіп, азаматтардың бостандықтарын айқындады. Мемлекетіміздің демократиялық даму қағидаттарын белгіледі.
Нұрболат Мақашев, Успен ауданының әкімі
Конституцияның рөлін нығайту және қықықтық мемлекеттің дамуы мемлекет басшысының жүйелі саясатының арқасында мүмкін болғанын ерекше атап өткім келеді. ҚР президенті конституция біздің егемендігіміздің берік құқықтық негізі, халық бірлігінің нышаны және әділдіктің кепілі деп атап өтті. Бұл сөз негізгі заң, бізге бағдар болатынын айқындайды.
Ата-заңымызға осы уақытқа дейін алты рет өзгеріс пен толықтыру енгізілді. Ең ауқымдысы 2022 жылы жасалды. Ол саяси жүйені жаңартуға және демократиялық институттарды күшейтуге бағытталды.
Мейіржан Әйткенов, Успен ауданының прокуроры
2022 жылғы конституциялық реформа елімізде демократияландыру мен саяси жүйені жаңғыртудың жаңа кезеңін бастады. Адам құқықтарын қорғау институттарының рөлі артты. Адам құқықтары жөніндегі уәкілдің мәртебесі көтерілді. Конституциялық сот құрылды. Бұл құқық үстемдігін нығайтуға ықпал етті.
Басқосуға прокуратура және полиция өкілдері, заңгерлер мен адвокаттар, азаматтық қоғам және жастар қатысты. Талқылау алаңы Конституцияның қоғамдағы орны мен маңызын жан-жақты қарастыруға мүмкіндік берді. Негізгі заң барлық сала үшін сенімді құқықтық бағдар екені аталды.
Марина Баданина, заң ғылымдарының магистрі
Бұл мерейтой – ел үшін маңызды кезең. Ол жүріп өткен жолымызды бағамдап, болашақ даму бағыттарын айқындауға мүмкіндік береді. Баршаңызға жемісті жұмыс пен жаңа идеялар тілеймін. Олар елімізде демократиялық негіздер мен құқықтық мемлекет құруға қызмет етеді.
Александр Ви, Успен ауданы ардагерлер кеңесінің төрағасы
Конституцияның маңызы зор екені ерекше айтылды. Басты заңымыз отыз жыл бойы қоғамдағы барлық қатынастарды реттеп келеді. Қатысушылар оны кеңінен түсіндіру мен насихаттау қажеттігін жеткізді.
Жиын барысында қатысушылар Конституцияның ел дамуы мен қоғамдағы орнына кеңінен тоқталды. Ата Заңға құрмет – мемлекетке деген сенімнің негізі екені айтылды.
Сабина Жолдаспаева