14 тамыз күні Павлодар облысының әкімі Асайын Байханов Ақсу қаласына арнайы келіп, жылу маусымына дайындық барысын тексерген еді. Онда шаһардың жылу желілерінде бірқатар ақаулар анықталды. Әкім мәселені жедел шешіп, мердігерге нақты тапсырма берген еді. Бүгін сол жұмыстардың нәтижесі толықтай шешілді.
Әкім мамандарға апатты жағдайды болдырмау үшін жобаны қайта қарап, құбырды жер асты нұсқасында қарастыру қажеттігін ескерткен. Сондай-ақ мердігерге жұмысты қысқа мерзімде аяқтау тапсырылды.
Асайын Байханов, Павлодар облысының әкімі
Құбыр үнемі қозғалыста болады. Оны екі жақтан тірек қысып тұрғандықтан, қысымнан ақау пайда болады. Бұл жобаны қайта қарап, құбырды жер астына көшіру қажет. Жұмысты бір апта ішінде аяқтаңыздар.
Бүгін біздің арна тілшілері жөндеу жүргізілген нысанға барып қайтты. Қазір апатты деп танылған нысанда жөндеу жұмыстары толық орындалған. Құбыр ауыстырылған жоқ, жаңа компенсаторлар орнатылып, бағана тіректер қалпына келтірілді.
Ержан Иманзайыпов,Павлодар облысы энергетика және ТҮКШ басқармасының басшысы
Бұл магистральдің ұзындығы мың метрден асады. Құбырдың үнемі кернеуде болуына байланысты тіректер мен компенсаторлар бұзылған. Жөндеу жұмыстары 2 қыркүйекке дейін аяқталуы тиіс еді, алайда мердігер мерзімінен бұрын аяқтап шықты. Қазір тек абаттандыру жұмыстары қалды. Ерте аяқталуы сапаға әсер еткен жоқ, барлық жұмыс талапқа сай орындалды.
Жөндеу жұмыстары 20 тамызда басталып, 28 тамызда толық аяқталды. Бұл – алдағы жылыту маусымында құбырдың тартылуына байланысты туындайтын қиындықтардың алдын алуға мүмкіндік береді.
Елдос Жанкарин, мердігер
Жұмысқа 80-ге жуық техника және 15 жұмысшы тартылды. Барлық жөндеу толық көлемде аяқталды. Енді тек абаттандыру жұмыстары жүргізілуде. Қалғаны дайын.
Ақсу қаласының негізгі жылу желілері мерзімінен бұрын жөнделді. Қала билігі апта соңына дейін ыстық су беруді жоспарлап отыр.
Сабина Жолдаспаева