Кеншілер күні – елімізде жыл сайын тамыздың соңғы жексенбісінде аталып өтеді. Бұл күн мамандардың ерен еңбегін бағалауға арналған ерекше мереке. Екібастұз қаласындағы «Восточный» көмір разрезінде талай жыл бойы үздіксіз еңбек етіп келе жатқан азаматтар бар. Солардың бірі – «Құрмет» орденінің иегері, инженер-жөндеуші Ержан Бақтыбай. Біз осы күнге орай кеншілер әулетімен танысып қайттық.
Ержан Бақтыбай 2011 жылы кәсіпорынға тракторист болып жұмысқа орналасқан. Үш айдан кейін слесарь болып ауысты. Кейін инженер-жөндеуші мамандығын игерді. Бүгінде ол техниканың тоқтаусыз жұмыс істеуін қамтамасыз етеді. Жұмысқа тиянақтылығы үшін «Құрмет» орденімен марапатталған.
Ержан Бақтыбай, инженер-жөндеуші
Жұмысым өзіме ұнайды. Әріптестерім жақсы. Бастықтарым да жақсы, көмектеседі. Мың жерден, қанша еңбек өтілім болса да, білмейтін жерің болады. Сол кезде көмектеседі. Осы жасыма дейін әлі түсіндірме қағаздарын жазып, қатаң сөгіс алып көрмегем. Себебі жұмысымды өзім жақсы істеймін. Уақытында келіп, барлық жұмысымды уақытылы бітірем. Тағы да басқа атақтарға ие болғым келеді. Пенсияма шыққанша, өзімді көрсетіп, жақсы жұмыс атқарып тағы наградаларға ие болғым келеді.
Кейіпкеріміздің отбасын нағыз кеншілер әулеті деуге болады. Ержан мырзаның төрт баласы бар. Үш ұлы әкесінің жолын қуып, бір кәсіпорында еңбек етеді. Кенже қызы мектеп оқушысы. Отбасының айтуынша, бір жерде жұмыс істегеннің өзіндік артықшылығы бар. Әрдайым бір-біріне тірек болып жүреді. Үлкен ұлы сол кәсіпорында механик болып еңбек етеді.
Бірлік Қерімқұлов, механик
Әкем маған: «Балам, болашағың жұмысшы мамандығында» деп жол көрсетті. Кейін інілерім де осы кәсіпке келді. Біз өз жұмысымызды жақсы көреміз, мақтан етеміз. Менің міндетім – техниканың ақаусыз жұмыс істеуін қадағалау. Күн сайын көліктердің жағдайын бақылап, учаскенің жұмысын тоқтатпай жүргіземіз.
Ортаншы ұлы Ерлік Қерімқұлов та кен өндірісіне әкесінің қасына келді. Бұған дейін кірпіш зауытында жұмыс істеген. Бірақ онда еңбек жағдайы ауыр болғандықтан, басқа жаққа ауысуды армандады. 2020 жылдан бастап көмір разрезінде еңбек етіп келеді.
Ерлік Керімқұлов, инженер
Менің қазіргі жұмысым – техникаға байланысты құжаттарды жүргізу. Жөндеу карталарын жасау, материалдар қорын толықтыру, ақаулардың себебін анықтау. Яғни, техниканың тоқтап қалмауын қадағалаймыз. Алғашында қарапайым жұмысшы болдым, қазір инженер дәрежесіне жеттім. Бұл ең алдымен тәжірибенің және әкемнің кеңесінің арқасы.
Бұл отбасының еңбекқорлығы жұмыс орнында ғана емес, үйде де көрініс табады. Олар жұмысты бірге талқылап, тәжірибелерімен бөліседі. Әрдайым бір-біріне қолдау көрсетіп отырады. Екібастұздық кеншілердің отбасылық дәстүрге айналған еңбегі – өскелең ұрпаққа үлгі.
Сабина Жолдаспаева