Туризмді дамыту бойынша артта қалған өңірлердің бірі- Павлодар. 17-ші орында тұр. Соңғы бес жылда саланы дамытуға небары 111 млн.теңге бөлінген. Баянауылдай көрікті жері бар, тұмса табиғаты ерекше өлкеде туризм неге кенжелеп тұр ?

Ертіс-Баян өңірі тауы мен жазығы, орманы, батпағы мен емдік суы шипалы орындарға бай. Алайда, әлемге паш етіп, шеттен туристер тарту былай тұрсын, жергілікті халық игілігін көре алмай келеді. Тіпті, соңғы жылдары туризмді дамытуға жобалар жасап, оны бюджеттен қаржыландыру жағы қорғалмайтын болған.

ӘСЕТ ОСПАНОВ СЫБАЙЛАС ЖЕМҚОРЛЫҚҚА ҚАРСЫ ІС –ҚИМЫЛ ДЕПАРТАМЕНТІ БАСШЫСЫНЫҢ БІРІНШІ ОРЫНБАСАРЫ

Соңғы бес жылда туризмді дамытуға 111 млн.теңге бөлінген. Соның басым бөлігі фестиваль, көрме, түрлі жиындар өткізуге жұмсалған. Яғни, формальды түрде жұмыс істеп отырмыз деуге бүркеншік болған. Бұл шаралардың туризмді дамытуға ешқандай септігі тимеген.

Аймақта көрікті мекен көп. Бірақ қызмет көрсету сапасы нашар. Бағасы қымбат. Инфрақұрылымды дамыту, осы салаға инвестиция тарту қозғалмай тұр. Мәселен, жолаушыларға қызмет көрсету орталығын ашқан төрт кәсіпкер былтыр төленуге тиіс 192 млн. теңге көлеміндегі субсидияны әлі ала алмай жүр.

ГҮЛМИРА ОТАРҒАЛИЕВА ТУРИЗМ САЛАСЫНДАҒЫ КӘСІПКЕР

Иә, біздің өңір туристік тартымдылығы жағынан еліміздің Оңтүстігі мен Шығыс Қазақстан, Астана қалаларымен бәсекелесе алмайды. Сондықтан қаржыландыруды көбейтіп, имидждік шаралар өткізуді ұлғайту керек. Бұл бізге өзімізде барды көрсетуге мүмкіндік береді. Ертіс өзенінің қос жағалауы, қарағайлы орман, емдік қасиеті бар тұзды көлдер. Көп өңірлерде жоқ осындай артықшылығымзды көрсете алмағандықтан туризм дамымайды әрине. ,

Аймақта туризмнің артта қалуына тағы бір кедергі бар. Ол спорт саласының тасасында қалуы. Бұны мемлекеттік қызметкерлердің өздері де мойындайды.

ДИАС ЖАКЕНОВ ПАВЛОДАР ОБЛЫСЫ СПОРТ БАСҚАРМАСЫ БАСШЫСЫНЫҢ ОРЫНБАСАРЫ

Туризм саласы бастапқыда спорт басқармасының ішінде болды. Одан кейін кәсіпкерлік басқармасына берілді. Қазір тағы спорт басқармасымен біргеміз. Жылдар бойы осылай өзгеріп отырады. Дегенмен осы жылы қаржыландыру көлемі ұлғайды. 48 млн. теңге бөлініп отыр. Бизнес туризм, тау туризмі, экотуризмді дамыту бойынша нақты жоспар әзірлеп қойдық.

Ішкі туризмді дамыту жобасы аясында биыл Павлодар қаласында бес жұлдызды қонақ үй салынады. Баянауылда денешынықтыру және сауықтыру орталығы ашылады. Сабындыкөлдегі жаңа жағажай туристерді қабылдай бастайды. Бірақ, осы бастамалар орта жолдан тоқтап қалмаса деген күдік бар. Себебі, Баянауылға туристер ұшып келеді деп салынған әуежай бір күн де жұмыс істемеді. Ал, Мырзашоқы тау-шаңғы базасы сол күйі қаңырап тұр.

Жанасыл Серікбол