Қала көшелерінде мас адамдардың жүруі – тұрғындарға жайсыздық тудырады. Соңғы кезде осындай құқық бұзушылықтар жиілеп кетті. Биыл 1846 азамат қоғамдық орындарда ішімдік ішіп, мас күйінде жүргені үшін жауапқа тартылды.
Алкоголь адамды заңсыз әрекеттерге итермелеуі мүмкін. Ал, қыс мезгілінде мұндай жағдайлар ішімдік ішушілердің өзіне қауіпті. Мас адам жарақат алып, кейде тіпті өміріне қауіп төнуі мүмкін. Полицияға көшеде мас адамдарды байқаған азаматтар жиі хабарласады. Мысалы, қала тұрғыны Желтоқсан көшесіндегі дүкеннің жанында тұрған ер адам туралы хабарлады. Торайғыров көшесінде әйел аулада жатқан адамды көріп, полицияға қоңырау шалды. Ломов көшесінде асхананың жанында тағы бір ер адам мас күйінде жатқан. Торайғыров көшесіндегі тұрғындар үй ауласындағы орындықта ішімдік ішіп отырған екі адам туралы хабар берді. Оқиға орнына жеткен полиция қызметкерлері бұл азаматтардың спирттік ішімдік тұтынғанын анықтап, оларды уақытша бейімдеу және детоксикация орталығына жеткізді. Тәртіп бұзушылар айыққаннан кейін әкімшілік жауапкершілікке тартылады. Қоғамдық орындарда алкоголь ішуге немесе мас күйінде жүруге заң бойынша тыйым салынған. Мұндай құқық бұзушылық үшін 5 АЕК мөлшерінде айыппұл қарастырылған. Бір жыл ішінде қайталанған жағдайда, айыппұл 10 АЕК-ке дейін өседі. Полиция азаматтарды құқық бұзушылықтарды байқаса, 102 нөміріне қоңырау шалуға немесе «police 102» мобильді қосымшасы арқылы хабарлауға шақырады.
Сабина Жолдаспаева