Бүгінде жұмысшы мамандықтарының маңызы артып келеді. Өндіріс орындары мен құрылыс саласында білікті мамандарға сұраныс жоғары. Сол себепті жастар еңбек нарығында қажет кәсіптерді игеруге ұмтылады. Солардың қатарында электрик мамандығын меңгеріп жүрген Данил Пыпченко мен дәнекерлеу ісін үйреніп жатқан Андрей Шарапов бар.
Кәсіптік колледждерде студенттер тек теориялық білім алып қана қоймай, оны практикамен ұштастырады. Олар заманауи құрал-жабдықтармен жұмыс істеуді меңгеріп, нақты өндірістік жағдайларға бейімделеді. Данил Пыпченко – болашақ электрик. Ол бала кезінен электр жүйесіне қызығып, осы салаға бет бұрған.
ДАНИЛ ПЫПЧЕНКО, СТУДЕНТ
Бала күнімде розетканың ішін ашып көргім келді. Сол сәтте жарық сөніп қалды. Әкем келіп, не істеп жатқанымды сұрады. Мен оған электр жүйесінің қалай жұмыс істейтінін білгім келетінін айттым. Сол кезде ол маған тоқтың фазасы жайында түсіндірді. Ал қазір, колледжде оқып жүріп, көп нәрсені меңгердім. Тіпті көпқабатты үйдің электр жүйесін қалай дұрыс жүргізу керектігін үйреніп жатырмын. Бұл мамандықтың ең басты қиындығы – қауіпсіздік талаптарын сақтау. Барлық сымдарды дұрыс жалғап, жарық жанғанын көргенде, өз жұмысыңның нәтижесін сезіну керемет әсер береді.
Электр жүйесі қаншалықты маңызды болса, дәнекерлеу ісінің де өнеркәсіп пен құрылыстағы орны ерекше. Андрей Шарапов бұл кәсіптің қыр-сырын меңгеріп жүр. Ол дәнекерлеуші болуды саналы түрде таңдаған.
АНДРЕЙ ШАРАПОВ, СТУДЕНТ
Мен дәнекерлеуші мамандығына оқуға түстім. Алғашында теорияны меңгердік, содан кейін практика басталды. Бұрын білетіндеріммен салыстырғанда, оқу орнында алған білімім әлдеқайда терең әрі жүйелі болды. Бұрын мен негізгі дәнекерлеу әдістерін ғана білетінмін, ал мұнда әртүрлі кеңістіктегі жұмыстарды қалай орындау керектігін үйретті. Мысалы, металл арасындағы бос орын белгілі бір қашықтықта болуы керек, ал әр металл түріне арнайы электрод таңдалады. Бұрын мұндай ұсақ-түйекке мән бермеген едім. Бұл кәсіптің артықшылығы – дәнекерлеушіге барлық жерде жұмыс табылады. Егер жақсы маман болсаң, жалақың да жоғары болады. Бірақ бұл кәсіптің қиындығы да бар – денсаулыққа әсер етуі мүмкін. Дегенмен ата-анам бұл мамандықты таңдауымды қолдады. Қазірдің өзінде қосымша жұмыс істеп, тәжірибемді жетілдіріп жүрмін.
Данил мен Андрей – өз ісін сүйетін жастар. Олар болашақта өз салаларының нағыз шебері болуды көздейді. Бүгінде білікті жұмысшы мамандарға сұраныс жоғары. Сондықтан бұл салада білім алып жүрген жастардың болашағы зор.
Сабина Жолдаспаева