Өңірде соңғы бес жылда орман қорының 2 мың шаршы метр аумағы жойылып, 216 заңбұзушылық анықталған. Табиғатқа келтірілген зиян 65 миллион теңге. Сондай-ақ, Павлодар ормандардарының бірінде тұқым жетіспеушілігі анықталды. Бұл жөнінде орталық коммуникациялар алаңында өткен брифингте айтылды.
Былтыр «Ертіс орманы» резерватының басшылығы ұйымдасқан қылмыстық топ құрып, заңсыз әрекет жасаған. Іс сотта қаралып жатыр. Одан бөлек, резерваттың Шалдай филиалында 12 миллион теңгенің қарағай тұқымы жетіспейтіні анықталды. Қазір ол тұқым қайта қайтарылды. Бұған жауаптылары тәртіптік жазаға тартылды.
ДАНИЯР ҚАМЗИН, ПАВЛОДАР ОБЛЫСЫ СЫБАЙЛАС ЖЕМҚОРЛЫҚҚА ҚАРСЫ КҮРЕС ДЕПАРТАМЕНТІНІҢ ПРОФИЛАКТИКАЛЫҚ БӨЛІМІНІҢ АҒА ОФИЦЕРІ
Резерват аумағында тұқым жинау арнайы құрылғы – бүршік кептіргіш арқылы жүргізіледі. Алайда жауапты қызметкер дән шығымын жасанды түрде көбейтіп көрсеткен. Бұл жағдай ұрлық ретінде қаралып, қылмыстық іс қозғалды. Тергеу барысында тұқым көлемі қолдан көбейтілген. Кейін жауапты тұлға 49 келі тұқымды зертханалық тексерістен өткізіп, жалпы көлемді нақты есепке сәйкестендірді. Осыған байланысты қылмыстық іс тоқтатылды. Дегенмен ол тәртіптік жазаға тартылды.
Ормандарды қалпына келтіру үшін көшет пен тұқым қажет. Бірақ оларды сатып алу кезінде жемқорлық тәуекелі жоғары. Бақылаудың жеткіліксіздігі қаржыны қалтаға басып қалу жағдайын туғызады.
ӘСЕТ ОСПАНОВ, ПАВЛОДАР ОБЛЫСЫ СЫБАЙЛАС ЖЕМҚОРЛЫҚҚА ҚАРСЫ КҮРЕС ДЕПАРТАМЕНТІ БАСШЫСЫНЫҢ БІРІНШІ ОРЫНБАСАРЫ
Мемлекет басшысы 2025 жылға дейін 2 миллиард ағаш отырғызу міндеті қойған еді. Алайда көшет пен тұқым тапшылығы қосымша сатып алуды қажет етеді. Сондай-ақ, өсімдіктерді басқа ортадан тасымалдау кезінде олардың белгілі бір бөлігі жарамсыз болып қалады. Бұл бюджет қаражатының шығынына әкеліп, тендер кезінде жемқорлық әрекеттерін арттырады. Бұған қоса бұл мәселені қадағалау болмағандықтан қаржы жымқырады.
Сыбайлас жемқорлыққа қарсы қызмет бұл мәселелерді зерттеп, 35 ұсыныс енгізді. Оның үшеуі орындалды. Қалғандары іске асу кезеңінде. Айта кетейік, орман шаруашылығы және жануарлар дүниесі комитеті «Ертіс орманында» 2029 жылға дейін ағаш кесуге тыйым салды.
Сабина Жолдаспаева