6 жасынан жыр жазып, 7 жасында жыр кешін жасап елді аузына қаратқан ақын бала Жамбыл Дүйсенов қала тұрғындары мен қонақтарын өзінің шығармашылық кешіне шақырады. Талайдың таңдайын қақтырған ақын зеректігінің арқасында түрлі байқауларда топ жарып жүр. «Жаңа күн» бағдарламасында қонақта болған ол алдағы жоспарларымен бөлісті.
Өлкеде ең жас ақын болып танылған Жамбыл Дүйсенов Павлодарда «Тәуелсіздік – тұмарым, бірлігім - ұлы ұраным» атты шығармашылық кешін өткізеді. Айтулы кеш 9 желтоқсан күні Қуат Әбусейітов атындағы мәдени сауық орталығында өтеді. Кеш төрт бөлімнен тұрады. Онда ақын соңғы туындыларымен бөліседі.
Жамбыл Дүйсенов, ақын:
Кешімнің бірінші бөлімі – патриоттық өлеңдер. «Мен-қазақпын!Мен қазақты сүйемін» атты тақырыбымен келеді. Екінші бөлімін поэзияға арналады. Әпкеме, әжеме, Фариза Оңғарсыноваға және «Оңай емес» деген тақырыппен өлеңдер оқылатын болады. Кешімнің үшінші бөлімі ұлы тұлғаларға, баршама ұлтымыздан шыққан ұлы перзенттерге, айта кетсек Абай Құнанбаев, Мұқағали Мақатаев, Жамбыл Жабаев және басқа да ұлы тұлғаларға арналады. Ал кешімнің соңғы төртінші бөлімін Тәуелсіздігімізге арнадым.
Ақын қаламынан 150-200 жуық өлең жазылды. Екі өлең жинағы жарық көрді. Оның біріншісін Жамбыл небәрі 7 жасында жарықка шығарған. Сол жылы «Ең жас ақын» номинациясымен Қазақстанның Гиннес рекордтар кітабына енді.
Жас ақын гастрольдік сапары аяқталған соң, барлық туындысын қамтыған «Өлеңім – менің өмірім» атты үшінші жинағын шығаруды жоспарлап отыр.
Ақмаржан Қалымбек