Павлодар қаласында көпқабатты үйлерді жаңарту, сырлау бойынша жұмыстар қарқынды жүріп жатыр. Биыл шаһардың 19 үйі боялып, жаңа кейіпке енді. Келер жылға жоспар қандай? Тілшіміз айтсын.
Павлодар қаласында көпқабатты үйлердің қасбетін бояу дәстүрге айналған жұмыс. Биыл да бұл бағытта шаралар қарқынды жүргізілді. 2025 жылы тағы 31 үйдің сырты жаңартылады.
АЙНҰР СӘДУАҚАСОВА, ПАВЛОДАР ҚАЛАСЫ ӘКІМДІГІНІҢ БАСПАСӨЗ ХАТШЫСЫ
Биыл облыс әкімінің тапсырмасы бойынша қалада көпқабатты үйлердің қасбетін бояуды жалғастырып жатырмыз. Лермонтов көшесі бойынша 19 үй сырланды, ол Набережный көшесінен Бұқар жырау көшесіне дейін. Келесі жылы Лермонтов көшесінде тағы 14 көпқабатты үй боялады деп жоспарланып отыр. Одан бөлек, тағы Торайғыров көшесі бойында 17 үй, яғни Баян батырдан Назарбаев көшесіне дейін сырланады.
Сондай-ақ, мердігер ұйымның әлеуметтік жауапкершілігі аясында қаланың көрікті жері «Биг-бен» сағаты жаңартылып жатыр. «Қазпошта» АҚ ғимаратының қасбеті боялуда. Жұмыстар 10 күнге жалғасады.
Самал Қалиқызы