Павлодарда кәсіпкерлермен жүк тасымалдаушы кәсіпорындардан жүйелі түрде пара алып келген облыстық көлік инспекциясы басшысының орынбасары ұсталды. Осыған байланысты сыбайлас жемқорлыққа қарсы іс-қимыл департаментінде арнайы жиын өтті.

«Бармақ басты, көз қысты» әркеттерге тоқтам сала алмаған инспекция басшысы жұмысынан алынған. Енді жаңа басшылық көлік прокуратурасы және сыбайлас жемқорлыққа қарсы іс-қимыл департаментімен қосылып кешенді жұмыс жүргізеді. Себебі, еліміздің темір жол, су жолы, көлік жолы логистикасына бақылау жасау автоматтандырылғанымен дәл осы салада заң талаптары жиі бұзылады. Әсіресе жазғы уақытта тасымал көлемі ұлғайған кезде жүк көліктеріне жолбасшы болғысы келетін делдалдар көбейеді..

Данияр Кәукенов, сыбайлас жемқорлыққа қарсы іс-қимыл департаментінің басқарма басшысы

-Сыбайлас жемқорлыққа қарсы орган көліктік инспекция басшысының орынбасарын 1 млн 200 мың теңге алып жатқан жерінде ұстады. Оның параны делдалдар арқылы жүйелі түрде алып отырғаны белгілі болды. Кәсіпкерлермен алдын-ала ымыраласып нормадан тыс жүк тиелген көліктердің күре жолмен кедергісіз жүруіне көмектескен. Ашық жиын өткізудің себебі, басшының бұл әрекетінен қарапайым инспекторлар, әсіресе жас мамандар сабақ алуы керек. Кәсіпкерлерді қосқанымыз пара берушінің де жазаланатының білуі керек.