Мерекелік кеш өткізуге рұқсат бар ма?

Павлодар облысы бес ай уақыттан аса қызыл аймақта.  Бас санитарлық дәрігердің 20 қыркүйектегі қаулысына сәйкес, бұқаралық іс-шараларды өткізуге тыйым салынған. Ал, "Ashyq" жобасына қатысатын мекемелерге корпоративтік кештерді өткізуге рұқсат беріледі дейді мамандар. Тек талап бар.

Ольга Жүнісова, санэпидбақылау департаментінің бас маманы:Ғимараттағы адам толымдылығы 50 пайыздан аспауы тиіс. Сондай-ақ, қонақтар мен қызметкерлердің жасыл мәртебесі болуы керек. Яғни, 7 тәуліктен аспайтын ПТР-тестілеудің нәтижесі, вакцинация паспорты міндеттеледі. Бұндай жағдайда мерекелік шара өткізуге рұқсат.

Бүгінде "Ashyq" жобасының қатысушылары түнгі сағат 12-ге дейін, ал жобаның көшбасшылары қызметкерлер мен қонақтарда "Жасыл" мәртебе болған жағдайда түнгі сағат 2 - ге дейін жұмыс істей алады. Бірақ кез келген жағдайда толымдылығы 50 пайыздан аспауы керек.

Ольга Жүнісова, санэпидбақылау департаментінің бас маманы:

Мысалы, ауданы 1000 шаршы метр болатын кафе, біз оны 4 шаршы метрге бөлеміз, өйткені бір адамға дәл осындай орын қарастырылған. 250 адам шығады, бірақ бұл 100%, яғни біз тағы 2-ге бөлеміз, сонда 125 адамға рұқсат етілген.

Корпоративтік шаралардың өтуін сол уақыттағы эпидемиогиялық ахуал анықтайды.  Бұны да ескерген жөн дейді мамандар. Айта кетейік, қазірдің өзіңде облыс бойынша 7000-нан аса объект Ашық арқылы жұмыс істеп жатыр.  

Аяулым Рахымжанова