Аймақ басшысы Асайын Байханов Павлодар қаласының бірқатар әлеуметтік нысанын аралады. Алдымен мансап орталығында болды. ОРтаплықтың негізгі жұмыс бағыты бойынша міндеттері қалай атқарып жатқандығы жөнінде пікір алмасты.

Орталықтың міндеті – жұмысқа орналасуға және жұмыспен қамтуға, АӘК тағайындауда жәрдемдесу, еңбек ресурстарының ұтқырлығын арттыру. Жыл басынан бері облыс орталығында жұмыссыз жүрген 7 мыңнан астам адам жұмысқа орналастырылды, 83 адам жаңа бизнес-идеяларын іске асыруға гранттар мен шағын несиелер алды. Бұнда күніне 90-100 адам келіп көмеке жүгінеді. Ал, бұл көрсеткіш әр айдың басында ұлғая түседі. Орталықтың бастты міндеттерінің бірі жұмыс беруші мен жұмыс іздеуші арасына дәнекер болу.

Облыс әкімі жас мамандардың жұмысқа орналасуына көмек көрсетуді негізгі басымдыққа алу керектігін айтты. Жұмыс өтілінің болмауы жұмысқа орналасуға кедергі келтірмеу керек деді.

Одан кейін Асайын Байханов менталды ауытқулары бар жандарға тегін әлеуметтік қызмет көрсететін «Альрами» клуб үйінің жұмысымен танысты. Клуб үйінің басты міндеті – оның мүшелерін психологиялық оқшауланудан шығуға және нақты ортада өмір сүруге бейімдеу. Бұл Қазақстандағы осындай тәжірибені қолданатын жалғыз мекеме. Бүгінде аталмыш мекеме жөндеуді қажет етеді. Облыс әкімі ғимараттың қасбеті мен шатырын жаңартуға көмектесетін меценаттарды тауып беруге уәде берді.

Сонымен қатар, өңір басшысы жаңа ғимаратының құрылысы басталған балалар психоневрологиялық орталығына барды. Жалпы ауданы екі мың шаршы метрді құрайтын жаңа ғимарат көптеген балаларға арнаулы әлеуметтік қызметтер алуға мүмкіндік береді.

Аймақ басшысы өмірлік қиын жағдайға тап болған балаларға қолдау жасайтын өңірлік орталыққа барып, жұмысын тексерді. Балалар қонақтарға шығармашылық және спорттық жетістіктерін дамыту үшін әртүрлі іс-шараларға бара алатын жаңа автобус қажет екенін айтты. Әкім бейінді басқармаға 2024 жылға арналған бюджетті бекіту кезінде осы мәселені қарауды тапсырды.

Содан соң облыс әкімі жұмыс сапарының соңында қарттар үйі мен мүгедектерді оңалтудың арнаулы әлеуметтік қызметтер көрсету орталығында болды.

Асайын Байханов аға буын өкілдері мен балалар аса қамқорлыққа мұқтаж екенін айтып, ерекше көңіл бөлуді талап етті.

Жанасыл Серікбол