Ал, Майқайың кентінде апатты қалпына келтіру жұмыстары жалғасып жатыр. Бұл мақсатқа қала құраушы бірнеше кәсіпорын да жұмылдырылды.
Майқайың кентіндегі d 1020 мм суық сумен жабдықтау құбырында анықталған ақауды жою жұмыстары жалғасуда. Жөндеу жұмыстарын «Екібастұз қалалық су арнасы» және қала құраушы кәсіпорындардан «Шығыс» разрезі, «Инженерлік желілер» ЖШС, «Майқайың-алтын» АҚ, сондай-ақ, Павлодар облыстық ТЖД мамандары жүргізуде. Барлығы 95 адамнан тұратын 10 бригада және 40 арнайы мамандандырылған техника жұмылдырылды. Жұмыс ақау шығуы мүмкін деліген 4 учаскеде жүруде. Тағы 11 учаскесінде құбырларды ашу жұмыстары жүргізіледі. Қосымша 2 бригада құрылып, олар кент ішіндегі судың ағуын, қысым бойынша тексеруде.
Анықталғандай Майқайың кентіне су төмен қысыммен берілуде. Сонымен қатар, көлемі 10 000 текше метр болатын резервуарда 2 тәулікке есептелген су қоры бар. Ол 231 жеке тұрғын үй, 58 көпқабатты тұрғын үй, 71 заңды тұлғаларға пайдалануға арналған. Су беру арқылы резервуарды тұрақты толықтыру қамтамасыз етілді. Сондай-ақ, тұрғындарға ауыз су мен техникалық су тасымалдануда. Бұл жұмыстарға 10 техника жұмылдырылған.
Жұмыстар анықталған ақау жойылғанға дейін үздіксіз жүргізілетін болады.
Жанасыл Серікбол